මහාචාර්ය මැදගොඩ අභයතිස්ස ස්වාමින් වහන්සේගේ මුල්‍යමය සහ තාක්ෂණික උපකරණ දායකත්වයෙන් ශ්‍රී ජයවර්ධනපුර විශ්වවිද්‍යාලයේ දෘශ්‍යභාධිත සිසුන් සඳහා කථන ග්‍රන්ථ පෙලක් ජුනි මස 29 වන දින මානවශාස්ත්‍ර හා සමාජියවිද්‍යා පිඨ රැස්වීම් ශාලාවේදී එලි දැක්වුණි.
මෙම සිසුන් සඳහා කියවීමට බේල් ක්‍රමයට පරිවර්තනය වූ ග්‍රන්ථවල හිගය ඔවුන්ගේ දෛනික අධ්‍යයන කටයුතු වලදී දැඩි අපහසුතාවයට පත් කරනු ලබන අතර මෙම කථන ග්‍රන්ථ එම අපහසුතාවයන් මගහරවා ඔවුන්ට දැනුම ලබාගැනීමට අවස්ථාව සලසා දෙන කාර්යක්ෂම මාර්ගයක් ලෙස හැඳින්විය හැකිය. සමාජ විද්‍යාව, මනෝ විද්‍යාව, සිංහල, බෞද්ධ ශිෂ්ටාචාරය ඇතුළු රජයේ තරග විභාග සඳහා අවශ්‍ය ග්‍රන්ථ 33 ක් කථන ග්‍රන්ථ බවට පරිවර්තනය කිරීම මානව ශාස්ත්‍ර හා සමාජීයවිද්‍යා පිඨයේ විද්‍යාර්ථින් විසින් සිදු කර තිබුණි.
මෙකි කථන ග්‍රන්ථ එළිදැක්වීමේ උත්සවයට ශ්‍රී ජයවර්ධනපුර විශ්ව විද්‍යාලයේ උපකුලපති මහාචාර්ය සම්පත් අමරතුංග මහතා, මානවශාස්ත්‍ර හා සමාජීයවිද්‍යා පිඨයේ පීඨාධිපති ආචාර්ය ඩි. පි. එස්. චන්ද්‍රකුමාර මහතා, ව්‍යවහාරික විද්‍යා පිඨයේ පීඨාධිපති මහාචාර්ය සුදන්ත ලියනගේ මහතා, කළමනාකරණ හා වාණිජ විද්‍යා පිඨයේ පීඨාධිපති, ආචාර්ය යූ. අනුර කුමාර මහතා සහභාගී විය. මිට අමතරව මෙම කටයුත්ත සඳහා විශේෂ දායකත්වය ලබාදුන් මහාචාර්ය මැදගොඩ අභයතිස්ස ස්වාමින්වහන්සේ, මහාචාර්ය මාගම්මන පඥ්ඥානන්ද ස්වාමින්වහන්සේ, ආර්ථික විද්‍යා අධ්‍යයනාංශයේ අංශ ප්‍රධානි ගාමිණී වීරසිංහ මහතා, මහාචාර්ය සමන්චන්ද්‍ර රණසිංහ මහතා, ආචාර්ය ඒ. එම්. නිමල් වසන්ත මෙන්ඩිස් මහතා ඇතුළු ආචාර්ය මණ්ඩලයද විද්‍යාර්ථින් රැසක්ද මෙම අවස්ථාවට සහභාගී විය.
